Abuztuaren 22an gutxiren eskura dagoen espektakulu bateaz gozatzeko elkartu ginen lagun batzuk: Zamorako Sanabriako zerua, Laguna de los peces-en konkretuki. Ez sinestekoa, hiriburu edo herri handietan bizi garenontzat. Traban Portugaleko Braganza hiriko argitasun txikia besterik ez. Gutako bat Canariasen bizi da aspaldi eta gure buru gaineko zerua hangoaren estilokoa zela komentatu zigun. 7. magnitudeko izarrak ikusten zirela kalkulatu zuen begi-bistaz. Hercules konstelazioko M13 kumulu globular famatua, arazorik gabe ikusten zen.

Behaketak irauten zuen bitartean, Canon 400D kamara tripodearen gainean jarri eta, A Coruñako Agrupación Ioko Oscar Blancok azaldutako metodoa jarraituz, lanean jarri nuen. 30”ko esposizioarekin, kamera argazkiak era jarraian ateratzeko ipinita, bateriak iraun zuen bitartean 56 argazki atera zituen.

Lurraren biraketa dela eta, izarren posizioa argazkitik argazkira aldatzen doa. Argazkiak 0.15 segundoko tartearekin Windowa Movie Makerrekin bata bestearen ondoan muntatuta, emaitza ondoko bideoan ikus dezakezuena da.

Zoritxarrez diafragma behar baino itxiago zegoen eta emaitza ilun xamarra da, baina lehenengo froga izateko, tira. Sekuentzian Hartz Handiaren zatitik ezagunena -Gurdia- ipar izarraren inguruan biratzen ikus dezakezue. Ipar izarra goian, apur bat eskuinera botata dagoen izartxoa da. Hobe bideoa iluntasunean ikusten baduzue.

Estilo honetako sekuentziak -ez dira zertan gaueko zerukoak izan behar- Time Lapse izena dute eta batzuk lortzen dituzten emaitzak benetan zoragarriak dira. Ikusi hauek The sky in motion. Web orri horretan, eskerreko zutabean, play list sakatu eta pelikulen zerrenda osoa ikusiko duzue, zoragarriak guztiak. Ez dakigu nola egingo duen honek bateriarik gabe ez gelditzeko, gau osoko sekuentziak lortzen dituelako.

Orain Ilargia handi egiten doala, saiatuko gara beste zerbait egiten. Ilargiaren argitasunarekin jarraian duzuen estiloko argazkiak atera ahal dira. Gezurra badirudi ere, argazkia gauerdia pasata hartutakoa da, goizeko ordu-batak aldean. Orain dela urte batzuetako abuztuko ilargi betearekin.