Noizean behin zeruak sorpresa bat ematen digu eta gau ahaztezin horietako bat oparitzen digu. Horrelakoa izan zen atzokoa. Balantzea egiten denean jakingo dugu ea adituen iragarpenak bete diren. Baina edozein kasutan, aurten gertatutakoa ereduak hobetzeko balio izango du. Horrelakoa da zientzia.

Gehienekiko abantaila dudala aitortu behar dut. Zamorako herri txiki batean nago udan eta hemen zerua zoragarria da. Etxearen atze aldean familia guztia etzanda jarri eta Esne Bideak era harrigarri batean zerua bi zatitan banatzen zuen, herri eta hiri handietan bizi garenontzat sinesteko ez moduko era batean.

Behaketa 23:15 inguruan hasi genuen eta 45 minutu eskas iraun zuen. Minutu zoragarriak benetan. Adituek esango dute, baina uste dut denbora tarte horretan maximo bat edota horrelako baten jaitsiera ikusi genuen. 7 urteko nire seme handienak 42 izar uso zenbatu zituen. Perseidak guztiak, bat ezik, ez bait zuen norabide egokia jarraitu. Izar usoaren norabidea atzeruntz luzatzen badugu, ozar izarraren radiantearekin egin behar dugu topo, Perseoko konstelazioan kasu honetan –horregatik izar ozar honen izena- eta W forma ezaguna duen Cassiopeiaren konstelazioaren azpian. Nire semerik gazteenak ere -5 urte ditu- bizpahiru perseida ikusi zituen. Jar dezagun 20tik gora ikusi zituela, bere adinean arazoak dituelako 10etik aurrera zenbatzeko. Barre batzuk bota genituen 16tik 21era pasatzen zenean, berea naiaren haserrearekin, adin hauetan guztia baita da lehiaketa.

Iparrera begira geunden, zeruko 100ºx80ºko zatia harrapatuz. Gutxi gora-behera kalkulatutakoak. Besoa luzatzen badugu, eskua zabalik, honek 20º inguru hartzen ditu. Bizkaiko Astronomia Elkartearen azaltzen den metodoa jarraituz, THZtasa oso handia ateratzen zait. Handiegia agian.
Umeak oheratu ondoren behaketarekin jarraitu nuen, baina ilbeheraren argiak behaketa dezente oztopatzen zuen jadanik. Baina nire ustez aktibitatea askoz ere txikiagoa zen.

Nire eszeptizismoak kalamidade hutsa bihurtzen nau batzuetan eta nire seme nagusienari nik ez nuela desioen historia horretan sinesten esan aurretik –berak galdetu zidan ze desio eskatzen ari nintzen- berak bi eskatuz ituen, eta berak bota bezala kontatuko ditut. Zortea izatea lehenengoa eta 99 edo 100 urte izan arte ez hiltzea. “Zergatik?” galdetu nion nik. “Hiltzea ez dudalako nahi. Hori ez da oso komodua izan behar”